پیاڵە/piyaľe: ن:[ کەرەستە][ هـ] ئیستیكان _ ستیكان، بادین، پەیالە، پیارە، پیال _ پیان، كاسە، ناڵبەكی.

{

خوم ئاسا خەڵێن وەتەن مەی خانەم

چون پیاڵەی وڕق شیشەی پە یمانەم

}{ مەولەوی}.

:: واتە شیشەی دڵم وەكوو پیاڵەی خالـی وایە هیچی تێدا نیە}{ مدرس}.

1 – جامی شەراب و مەی بۆ خواردنەوە.

:: پیاڵەی شەراب.

2 – ئەندازەیەك بۆ خواردنەوەی مەی و بادە.

:: بە دووپیاڵە مەست دەبێت.

3 – ئیستیكانی چاخواردنەوە.

لەپیاڵەدان/lepiyaľedan: كتن:[ لە+ پیاڵە+ دان] بەسلامەتی خواردنەوە.

{

لەودەمەی دا پیاڵە دەدرێن لە پیاڵە

لەو دەمەی دا لێوتان بە بادە ئالە

}{ هێمن}.

پیاڵەفرۆش/piyaľe firoŝ: نفا:[ پیاڵە+فرۆش( فرۆشتن)] كەسێك كە لە مەیخانە مەی و بادەبە پیاڵە و پێك دەفرۆشیت و كریار دەستبەجێ لەوێ دەیخواتەوە.

پیاڵەفرۆشتن/piyaľefiroŝtin: كتن:[ پیاڵە+ فرۆشتن] پیاڵەفرۆتن.

پیاڵەفرۆشیی/piyaľe firoŝyî: نچ:[ پیاڵە+ فرۆش+ ئیی]

1 – كار و پیشەی پیاڵەفرۆش : ئارەقفرۆشی.

2 – دوكان و شوێنی كاری پیاڵەفرۆش.

پیاڵەگێڕ/piyaľegěř: نفا:[ پیاڵە+ گێڕ( گێڕان)] ساقی، بادەگیڕ، مەیگێڕ : كەسێك كە پیاڵە و جامی مەی دەگێڕێت و دەیدا بە مەیخۆران.

{

ئەی پیاڵەگێڕی مەجلیسی تۆ تووشی نەوزەری

كەیخوسرەوی زەمانی و جەمشیدی كیشوەری

}{ بێخود}. ‎‎

پیاڵەگێڕان/piyaľegěřan: كتن:[ پیاڵە+ گێڕان] بادەگیڕان، مەیگێڕان.

پیاڵەگێڕیی/piyaľegěřyî: نچ:[ پیاڵە+ گێڕ+ ئیی] ساقێتی، بادەگیڕیی، مەیگێڕیی : كار و پیشەی پیاڵەگێڕ. ئەوەی پێوەندی بە مەیگێڕییەوە هەبێت.

پیاڵەی چاو/ piyaľey čaw: نتـ:[ توێ] پیاڵەی دیدە، چاوخانە : ئەو قوڵكەی كە چاو تییای جێگیرە.

پیاڵەی دیدە/piyaľey dîde: نتـ: پیاڵەی چاو ، چاوخانە : ئەو قوڵكەی كە چاو تییای جێگیرە.

{

پیاڵەی دیدە لە برێزە دلا تۆش

بجۆشە سازی ناڵەی هەم ببێ كۆك

}{ مەحوی}.

پیاڵەی شەراب/piyaľey ŝerab: نتـ: ئەو پیاڵەیەی كە مەی و شەرابی تێدا دەخورێتەوە.

پیاڵەی مەی/piyaľey mey: نتـ: پیاڵەی شەراب.

{

لە شێخ و واعیز و سۆفی لە مەولا من كەنار ئەگرم

پیاڵەی مەی بە یادی دیدەیی مەستی نیگار ئەگرم

}{ ئەحمەد موختار}.

.

.

.

.

.

 

.

.

.

.