پوخت/puxt: ن:[ فار: پخت( پۆخت) لە: پختن( پۆختن)]
1 . مرۆڤی تێگەیشتوو، بەئەزموون.
2 . ڕێكوپێک و خاوێن، تەواو، لەبار، بێ كەمووكووڕیی، پوختە.
3 . تەكووز.
4 . سەرئەنجامی كورتكراوە.
پوختە/puxte: ن:[ فار: پختە]
1 . كاروباری دروست، ڕێكوپێک، ساز.
2 . لێنان.
3 . گەیشتوو، پێگەیشتوو، بە ئەزموون.
{
ئەو زولفە دووتایە چ تلیسمێكە چ دامە
سووتاوە ئەوی پوختەیە بەو عەنبەرە خامە
}{ وەفایی}.
پوختەبوون/puxtebûn: كتن:
1 . پێگەیشتن و كامل بوون.
2 . پڕ و تەواوبوون، ڕێکوپێک و بێ كەمووكووڕیی بوون.
{ شیعرەكانم پوختە نەبوون، ڵاسای شاعیرە كۆنەكام كردبۆوە }{ هێمن}.
پوختەكراو/puxtekiraw: ئانفا: بەسەروبەر، خەمڵاو، دامەزراو، سازاو، تەبار، دەردەست.
پوختەكردن/puxtekirdin: كتپ:
1 . ڕێکوپێک كردن.
2 . كوڵاندن.
3 . پێگەیاندن، كامل كردن.
{
بریا کلێک بام لە كن سوبحانی
پوختەیان كردبام لە كن لوقمانی
}{ گەنج، ل، 6}.
پوختەدەنی/puxtedenî: ئانتـ:[ ئەردە] كوڵاو، لێنراو.
پوختەگی/puxtegî: نچ: پوختەیی.
پوختەی قسە/puxtey qise: نتـ: سەرجەم و خوڵاسەی قسە و ڕووداو و كارەساتێک.
:: پوختەی قسەکانتم پێ بڵێ، با بزانم دەڵێی چی.
پوختەیی/puxteyî: نچ: ڕێكوپێكی لەكاروباردا.
پوختبوون/puxtbûn: كتن:
1 . تێگەیشتن و ئەزموون بوون.
2 . ڕێکوپێکوخاوێن بوون.
3 . بێكەمووكووڕیی بوون، پۆختەبوون، كامل بوون.
:: ئەم پارچە شێعرە لە چاو سەنعەتی شیعرییەوە زۆر پوخت نیە. {چەپکێ گوڵ. ل .54}.
پوخت كردن/puxtkirdin: كتپ:
1 . پێگەیاندن، پاش پەروەردەكردن و بارهێنان.
2 . ڕێكوپێک ئەنجام دانی كارێک.
پوخت و پاراو/puxt û paraw: ئانتـ:[ پوخت+ و+ پاراو] ژنی پاک و ڕێکوپێک و ماڵدار.
:: كابانی چاک لە ماڵدا پوخت و پاراوە.
پوخت و پاراو بوون/puxt û paraw bûn: كتن: ڕێكوپێک و ماڵداربوون.
پوخت و پەز/puxt û pez: نتـ:[ پوخت+ و+ پەز]
1 . چیشت لێنان، شێولێنان.
2 . بڕیار، بەڵێن پێكدان.
پوختی/puxtî: نچ: ڕێكی، خاوێنی، پوختەیی.
.
.
.
.