سەرەتای ئافراندنی فەرهەنگێکی مەزن
هوون خوه‌ش هاتن ژ بۆ ماڵپه‌ری فه‌رهه‌نگی زمانی یه‌کگرتوی کوردی هاوچەرخ.
ماڵپەڕی فه‌رهه‌نگی ئه‌ناهیتا، بەئەوپەڕی نیکبەختییەوە ڤەکراوەیی وەشانی ئەم فەرهەنگە سەرهێلییە دەکات، کە پڕانی په‌یڤی زوانی کوردی لە خۆ کۆکردووەتەوە، له سه‌رجه‌م شێوه‌زاره‌کانی زبانی کوردی. ئێستاکانێ خەریکی گوێزانەوەی لاپەڕەی کاغەزیین بۆ ڕووپەڕێکی ئێلێکترۆنی بۆ ناو ئەم ماڵپەڕە یە. هاودەم لە هەوڵی کۆکردنەوە و پێشکەشکردنی مژاری نوێیین بۆ پوختەکردن و تەکووزی کردن لە نێو مژاکەکاندا. بۆ سوود وەرگرتن لەم ماڵپەڕە نه پێداویستی به ئابوونه هه‌بوونه و نه به خۆتۆمارکردنيش.
ئه‌م پێڤاژۆیه ته‌قه‌لایه‌که، بۆ زیندوڕاگرتنی زمانی کوردی و به‌ئاوێته‌کردنی هه‌موو شێوه‌زاره‌کانی زوانی کوردی و دامه‌زراندنی فه‌رهه‌نگێکی به‌رفراوان و کە گشت ڕشته زانستییه‌کان له ژێر ئه‌م چه‌تره‌دا کۆبکات و زمانێکی پاراو و ڕەوان ئاراسته‌ی خوێنه‌ری زوانی کوردی بکات.
ڕوونە کە له ڕۆژگاری ئه‌ڤڕۆدا که گلۆباليزم ڕه‌هه‌نده‌کانی خۆی ده‌پێکێت و هه‌ميشه و به‌به‌رده‌وام په‌یڤ و ده‌سته‌واژه و زاراوه‌ی زانستی نوێ دێنه‌کایه‌وه. زمانی کوردیش، وه‌ک زمانێکی زیندوو هاوشانی زمانانی دیکە لە هه‌وڵی خۆپاراستن، خۆزيندووڕاگرتن و خۆنوێکردنه‌وه دایه .
ئه‌غیارم له‌وه‌ی که فه‌رهه‌نگ چێکرن ئه‌رکی تاکه که‌سێک نیه، به‌ڵام مه‌خابن له مامۆستا شێخ محه‌مه‌دی خاڵی نەمرەوە ئه‌م ئه‌رکه بووه به نه‌ڕێت له لای ئێمه‌ی کورد، گه‌رچی بەرهەمەکان پڕن له هه‌ڵه‌ی زه‌ق و نزمی ئاستی زانستی لە چاو زمانانی دیکە. جێی داخەکە تاوەکو ئێستا وەک نەتەوەی کورد نەمان توانیوە ئینیستیتوتێک دامەزرێنین و کاری تەرخان کرابێت بۆ نووسێنەوەی فەرهەنگی زمانی یەکگرتووی کوردی چ لە ناوەوە و چ لە دەرەوی کوردستان. بۆیە بە ئەرکی سەرشانی خۆمم زانی وەک تاکێکی ئەم نەتەوەیە، کە چل میلیۆنییە و خاوەن فەرهەنگێکی یەکگرتتوو نییە، کارێک بکەم لە بۆ ئافراندنی خەونێکی وەها مەزن بەهەر سێ ئەلفەبێتی ئارامی، لاتینی و ئاڤێستایی.
بۆیه بەئامێزێکی ئاوەڵاوە پێشوازی لەهه‌ر پێشنیار، چاککردنه‌وه‌ی زمانه‌وانی و ڕه‌خنه به‌نرخه‌کانتان ده‌که‌م.
ئاره‌زوومه‌ندانه ئه‌م ئه‌رکه‌م بە تەنها گرتووه‌ته ئه‌ستۆی خۆ و وه هومێده‌وارم که توانيبێتم خزمه‌تێکی بچووکی زمانه شیرینه‌که‌ی کوردییم کردبێت.
خۆشبەختانە توانیم زۆربەی ئەو پەیڤانەی کە بە پیتەپزوێنەکانی زمانی کوردی دەستپێدەکەن تۆماریانکەمە نێو ئەم ماڵپەرەوە؛ کە خۆیان لە پیتی( ئا ، ئە ، بزرۆکە ، ئۆ ، ئو ، ئوو ، ئێ ، ئی ) دەبیننیەوە.
هەنووکە خەریکی گوێزانەوەی ووشەکانم کە بە پیتی ( ب) دەستپێدەکەن بۆ ناو ماڵپەرەکە، ئومێدەوارم جێی پەسەندی ئێوەی بەڕێز بێت.
دروود بۆ ئێوەی هێژا و بەڕێز
یوسف ڕەشید